Inatsit
tunngaviusoq
Ataani
atuarneqarsinnaapput isumaginninnermut tunniuttakkat pillugit inatsisit
tunngaviusut naatsumik allaaserineqarnerat.
Annertunerusumik
paasissutissanut Isumaginninnermut, Ilaqutariinnermut, Naligiissitaanermut
Sulisoqarnermullu Naalakkersuisoqarfik, Namminersorlutik Oqartussat
nittartagaanni www.naalakkersuisut.gl
–imiittumi innersuussutigineqarpoq, tassani isumaginninnerup iluani inatsisit,
peqqussutit nalunaarutillu il.il. atuutsinneqartut atuarneqarsinnaallutillu
aaneqarsinnaapput.
Pisortanit
ikiorsiissutit
Pisortanit
ikiorsiissutinik, aningaasartuutinut aalajangersimasunut ikiorsiissutinik
kiisalu immikkut ittumik tunngaveqarluni ikiorsiissutinik pisartagaqalersinnaatitaanermi
piumasaqaataavoq qinnuteqartoq aalajangersimasumik najugaqarfeqarnissaa,
Kalaallillu Nunaanni inunnik nalunaarsuisarfimmi nalunaarsorsimanissaa.
Pisortanit ikiorserneqarneq pisarpoq aatsaat pisariaqartitsineq
ikiorsiissutinik allanik matuneqarsinnaanngippat. Pisortanit
ikiorsiissuteqarneq pisarpoq Pisortanit ikiorsiissutit pillugit Inatsisartut
peqqussutaat nr. 15, 20. november 2006-imeersoq tunngavigalugu, taanna kingusinnerusukkut
allanngortinneqarpoq.
Pisortanit
ikiorsiissutinit akileraarutinik akiliisoqarneq ajorpoq. Ikiorsiissutit
akileraarutaasussatut nalunaarutigineqartut tassaapput kommuninit pisortanit
ikiorsiissutitut isertitat Akileraartarnermut Aqutsisoqarfimmut
nalunaarutigineqartussat. Isertitat pineqartut isertitanut nalunaarsuiffimmut
nalunaarutigineqartarput inoqutigiit ass. Meeqqanut
tapiissutinik pisartagaqalernissaannut imaluunniit ineqarnermut tapiissutinik
pisartagaqalernissaannut aalajangeeqataasarlutik.
Suliffeqanngikkallarnermi
ikiorsiissutit
Suliffeqanngikkallarnermi
ikiorsiissutit suliffeqannginnermik, napparsimanermik imaluunniit
ajutoorsimanermik peqquteqartumik inuussutissarsiorluni isertitaqarunnaarnermi
tunniunneqartarpoq.
Suliffeqanngikkallarnermi
ikiorsiissuteqartarnermi angerlartitaasimasutut nalunaarsorneqarsimasut
suliffeqanngikkallartullu kiisalu nammineq pisuussutiginngisamik
suliffeqanngikkallartut, angerlartitaasimasut napparsimasullu
inuussutissarsiornermi isertitaasa taarserneqarnissaat isumannaarniarneqarpoq.
Ikiorserneqarnissamut
piumasaqaatit naammassineqartariaqartut tassaapput:
· 18-inik ukioqalereersimanissaq
imaluunniit pilersuisuunissaq,
· Kalaallit Nunaanni inuit
allattorsimaffiani nalunaarsorsimanissaq, kiisalu
· Sapaatip akunnerini 13-ini
kingullerni akissarsiaqarluni suliffeqarnikuusimanissaq piffissamilu tassani
minnerpaamik akunnerit 182-it suliffiginikuusimanissai. Piffissaq
suliffeqanngikkallarnermi ikiorsiissutinik pisartagaqarfiusimasoq
suliffeqarluni isertitaqarfiusimasutut naatsorsuussaanngilaq.
Suliffeqanngikkallarnermi
ikiorsiissutit annertussusaat, ullormi siullermi suliffeqanngitsutut
agguaqatigiissillugu akunnerit sapaatip akunnerini 13-ini kingullerni akissarsialittut suliffiusimasut malillugit
naatsorsorneqartarput. Ikiorsiissutillu annerpaamik sapaatip akunnerini 13-ini
pisartagarineqarsinnaapput.
Suliffeqanngikkallarnermi
ikiorsiissutit akileraarusigassaapput, SIK-mi Naalakkersuinilu
isumaqatigiissutit malillugit akit minnerpaat ilinniagaqarsimanngitsunut 90
procentiinik naleqarlutik.
Suliffeqanngikkallarnermi
ikiorsiissutit Inatsisartut inatsisaat nr. 2 15. maaji 2014-imeersoq
suliffeqanngikkallarnermi ikiorsiissutit pillugit 1. juuli 2014-imi
atuutilersoq malillugu tunniunneqartarput.
Ernereernermi
ullormusiat il.il.
Malugiuk:
Immikkoortoq una 24.05.2023
iluarsineqarpoq.
Ernereernermi
ullormusiaqartitsineq pisarpoq ernisimalluni sulinngiffeqarnermi
isertitaqarunnaarsimagaanni. Ullormusiaqarsinnaatitaaneq akissarsiaqarlutik
sulisunut, namminersortunut taakkulu aapparisaannut pilersueqataasunut soorlu
aalisartunut, piniartunut savaatilinnullu aammalu ilinniagaqarsimallutik
naammasserlaanut ilinniarnissamullu ilinniarfinnut aalajangersimasunut
qinnuteqarsimasunut atuuppoq. Ullormusiat annertussusaat ilinniagaqarsimanngitsunut
akunnermut aki ilanngaatitaqanngitsoq malillugu annerpaamillu sapaatip
akunneranut akunnernut 40-nut annertussusilinnut naleqqussagaavoq.
Ernereernermi
ullormusianut atuutsinneqartut tassaapput:
· Naartusoq erninissamut naatsorsuutigisamit
sapaatip akunneri sisamat sioqqullugit sulinngiffeqarsinnaatitaavoq.
· Meerartaarnermi siullermi
anaanaasoq ernereernerup kingorna sapaatip akunnerini 15-ini
sulinngiffeqarsinnaatitaavoq kiisalu meerartaaqqinnermi imaluunniit amerlanerusunik
meerartaaqqinnermi ernereernerup kingorna sapaatip akunnerini 19-ini
sulinngiffeqarsinnaatitaalluni.
· Ataataasoq meeqqap/meeqqat
inunngoreerneranniit sapaatip akunneri pingasut sulinngiffeqarsinnaatitaavoq.
· Angajoqqaat, tassa imaappoq
nammineq toqqakkamik angajoqqaajusoq, siullerpaamik meerartaarnermi
ernereernerup kingorna aamma sapaatip akunneri 21-t
sulinngiffeqarsinnaatitaavoq kiisalu meerartaaqqinnermi arlalinnilluunniit
meerartaaqqinnermi ernereernerup kingorna aamma sapaatip akunneri 25-t
sulinngiffeqarsinnaatitaalluni (angajoqqaat sulinngiffeqarsinnaanerannut
inatsit malillugu).
Ernereernermi ullormusiaqartitsineq
pisarpoq Inatsisartut Inatsisaat nr. 5 24. novembari 2020-meersoq
naartunermi, ernereernermi meeravissiartaarnermilu sulinngiffeqarneq
pillugu inatsit.
Meerartaarnermi sulinngiffeqarnerup takissusaa
2009-mi kisitsisitigut paasissutissat
kisitsisaataasivimmi kisitsisaatigineqalernerisa
kingorna allanngoqattaarnikuuvoq.
Nalunaarsuutit
tunngaviusut aamma suliarineri
Isumaginninnermut
kisitsisitigut paasissutissanut tunngaviusut pisortaqarfiit ataatsimoorussamik
aningaasarsianut, kommunit naatsorsuutaanit aamma Naatsorsueqqissaartarfiup
innuttaasunut nalunaarsuiffianninngaanneersuupput.
Suliffeqannginnermi
ikiorsiissutinut aamma ernereernermi ullormusianut paasissutissanut najoqqutat
saqqummersitami uani allanngorput. Taakku ukioq 2016 aallarnerfigalugu
aningaasarsianut nalunaarsuutinit pissarsiarineqarput. Najoqqutat allanngorneri
ilutigalugit siornatigut kisitsisit saqqummiunneqarsimasut iluarsineqarput.
Piffissat aaqqissuunneqarnerat pitsaaneruvoq kiisalu kisitsisitigut
paasissutissat kommunillu Akileraartarnermut Aqutsisoqarfimmut
nalunaarutigisartagaat assigiinnerulerlutik. Taakku saniatigut 2016 sioqqullugu
kisitsisit suliffeqannginnermi ikiorsiissutinut aamma ernereernermi
ullormusianut tunngasut saqqummiunneqarsimasut iluarsaanneqarput.
2021
aallarnerfigalugu kommuni tamarmik ataatsimoorussamik allaffissornikkut
katersuiffeqalerput. Katersanit pisortanit ikiorsiissutit tunniunneqartut
pissarsiarineqarput. Siornatigut pisortanit ikiorsiissutinik
iluarsaanneqanngillat.
Kisitsisitigut
paasissutissat aaqqissuunneri
Nalunaarsuutit
tunngaviusut allaffissorluni nalunaarsuiffinninngaanneerput, kisitsisitigullu
paasissutissiinermut atortussiatut ineriartortitaanatik, taamaattumillu
nalunaarsuutit tunngaviusut suliareqqillugit misissorlugillu suliaapput.
Nalunaarsuutinik
misissuineq
Ikiorserneqarsimasut
allattorsimaffianni ilaasut ikiorserneqareernerup kingorna ikiorsiissutinik
utertitsisimasut (ikiorsiissutigineqartunik taarsiisimasut),
kukkunermilluunniit allattorsimaffimmiittut naatsorsuutinut ilaanngillat. Inuup
normui atorsinnaanngitsut nakkutiginnilluni misissuinermi peerneqarput.